英甲今晚有場伯頓對高雲地利嘅前列大戰上演，主隊伯頓雖然得領隊哈索賓基叫做最出名，不過呢位前荷蘭射手上年底掌帥後愈踢愈好，今季5戰4勝排喺聯賽第3位，今場對住英甲鋒力最強嘅高雲地利，分分鐘開入球騷。（TVB301周日晚9:30直播）

伯頓特訓提升火力
伯頓上周中喺英錦賽畀唐卡士打悶和後射輸12碼出局，不過其實佢哋喺呢場波收起咗7件主力，擺明就係想谷聯賽，充滿入波DNA嘅哈索賓基賽前仲講到明，為咗提升前線把握力安排特別訓練，進攻火力有望大大

提升。

客軍高雲地利今季有前冇後，暫時5戰入12球係全英甲火力最猛嘅一隊，射手阿當岩士唐更加踢5場入5球，轉會窗關閉前仲簽埋前西布朗前鋒艾福特添，明顯想擺大個頭，睇番呢班波防守力麻麻近3戰場場失兩球，睇怕今仗又要以攻代守。