日聯盃今日有幾場8強次回合上演，當中神戶勝利船喺主場迎戰柏雷素爾場波值得吼實，原因係神戶勝利船首回合作客已經贏咗場2:0，教練尼仙奴喺聯賽領軍倒戈鬥柏雷素爾連輸兩場後，終於贏波威番次，加上又有射手渡邊千真翻生，夠晒條件打穩守突擊，就算隊長鄭又榮要代表南韓國家隊缺陣都冇有怕，有望再砌低柏雷素爾。

柏雷素爾留力聯賽
柏雷素爾首回合喺地頭出戰，都夠膽死收起射手艾達臣艾維斯、隊長大谷秀和同門將菅野孝憲，射手基斯坦奴達施華同工藤壯人亦只係後備上陣，咁樣派兵已經證明佢哋對日聯盃冇乜興趣，似乎想集中火力喺聯賽爭次階段冠軍，今場會排番強陣？講你都唔好信啦！