日聯盃初段慣用生牯仔
好老實，日皇盃唔到8強，好多傳統勁旅都鍾意起用生牯仔，有啲仲係大家聽都未聽過嘅，所以今日日乙「一哥」大宮松鼠响第二圈主場迎戰「四哥」東京綠茵，真係好難估到佢哋開邊瓣，簡單啲博個1.68倍入球細算嘞。

表面去睇，大宮對綠茵始終係日乙頂級戲碼，理論上會有一番激鬥，問題係絕大多數日職、日乙球隊，喺日皇盃初始階段都以練兵做目標，出埋唔少天才細路，令到雙方實力出現變化，於是乎就比較易爆冷嘞。

6次交手開5細1大
好似今日場波咁，大宮可能會起用一對年輕中場，包括19歲嘅高山和真同埋20歲嘅大山啟輔。綠茵呢？除咗22歲高木善朗（中場）同19歲胞弟高木大輔（前鋒），好大機會兩兄弟拍住上，仲有件後衞大木曉添，呢個23歲球員响足智彩球員名單連名都冇。一大群UFO（不明飛行物體）出現，嗌你根據兩隊聯賽排名嚟揀買邊隊，同呃你冇乜分別，所以九叔疊埋心水推介入球細。

點解咁揀？原因係呢兩隊歷史上6次對碰，開咗5細1大，慣性入波唔多，而且雙方近態都麻麻，除咗响日皇盃對啲低兩、三班嘅對手有大手斬獲，近兩場聯賽啲前鋒都立立哋油，呢啲環境都係博入球細好啲。