荷蘭上仗喺歐國盃外圍賽A組比賽，主場0:1輸畀冰島後，家陣得10分排喺小組第3，嚟緊再有乜差池，今屆歐國盃可以唔使預佢哋。今仗荷蘭作客少佢哋1分排第4、同樣力爭附加賽席位嘅土耳其，肯定遇到極大阻力，加上王牌洛賓打柴，仲邊讓得起對手平半，梗係捧1.94倍下盤。

（有線61及201台周一凌晨0:00直播）

荷蘭上年搵咗名帥希丁克執教後，完全踢唔出應屆世盃季軍水準，最終呢位領隊喺早前6月宣布辭職，由副手白蘭特坐正。通常新官上任都會有段蜜月期，點知呢位前荷蘭國腳勁黑仔，上場鬥冰島有主力洛賓勇戰受傷、馬田斯恩迪領紅、雲達韋爾犯天條輸12碼乜都齊，點搞呀？

洛賓打柴 馬田斯恩迪停賽
結果荷蘭喺A組分別落後畀冰島同捷克8分同6分，得番3輪比賽，領隊白蘭特都認低威，話寄望守住第3位，透過附加賽保住打入歐國盃機會，班波依家壓力真係大到癲。點知白蘭特喺呢個時候大搞批鬥，炮轟守將馬田斯恩迪攞紅牌累街坊勁唔專業，又鬧雲達韋爾唔應該侵犯對手送12碼益冰島。大戰前夕搞分裂，就算佢哋補入翼鋒謝明蘭斯、中堅華基爾雲迪積克，都好難挽回低沉士氣囉，今仗仲搵鬼拚死一戰先？

史奈達畀對手捉晒路
至於背水一戰嘅土耳其，只要佢哋今仗砌低荷蘭，即以2分之差反壓對手跳上第3位，大大提升得到附加賽席位機會，點到佢哋唔搏。事實上球隊喺首循環作客荷蘭，如非前鋒亨特拉爾喺補時階段建功追和1:1，土耳其早就將3分攞到手，呢鋪回師主場踢高一班勝望更濃。再者，「橙衣軍團」翼鋒洛賓受傷，另一核心史奈達喺土超搵食多時，有咩套路都畀主隊班球員睇透晒，冇咗呢兩大發電機輸出電力，荷蘭跌晒Watt，土耳其今仗仲唔坐和望贏？