B組另一線塞浦路斯主場對比利時，呢組競爭激烈，比利時出線席位仍未穩，需繼續搏殺，呢支「歐洲紅魔」勝在人才輩出，夏薩特、奇雲迪布尼、費蘭尼、盧卡古、高柏尼以至門將泰拔高圖爾斯，個個都係英超豪門猛將，只要一踩油，塞浦路斯肯定招架唔住。比利時淨贏兩粒冇難度，直取讓球客勝。

（有線64及203台周一凌晨2時45分直播）

剛過去轉會市場最紅人物，必數由禾夫斯堡轉投曼城嘅奇雲迪布尼，呢位上季德甲助攻王身價高達5,800萬鎊。加上仲有夏薩特幫手，比利時呢條「黃金中場」屬世界級，二人射術亦佳，上仗一齊有波入，為比利時以3比1擊敗有迪斯高助陣嘅波斯尼亞，「魚腩部隊」塞浦路斯撞正佢哋預咗做炮灰。

塞浦路斯等做炮灰
塞浦路斯以本土聯賽球員為骨幹，級數同比利時差一大截，首循環作客比利時就慘吞5蛋。球隊上輪同榜首威爾斯激戰激戰後輸波，消耗大量體力又攞唔到分，士氣進一步受打擊，面對比利時更加冇得打。