阿根廷國家隊呢個禮拜雖要踢熱身賽，但國內聯賽仍然照常舉行，因此部分要為國家隊披甲嘅球員就無法替球隊上陣，球迷揀心水時要留意。競賽會近五仗未輸過，不過上仗喺領先下因對手球迷騷亂令賽事腰斬，谷住成肚火，今仗主場出擊遇上近況麻麻嘅甘拿斯亞，勢必要贏波一吐烏氣，競賽會讓平半捧上盤。

（周一早上8時30分開賽、馬會網上文字直播）

競賽會上周聯賽作客葛度爾古斯，雖然開波3分鐘就由迪亞高米列圖射入12碼先開紀錄，但踢踢吓最終因球迷騷亂而被迫腰斬，搞到球隊暫時未能追近榜首嘅小保加同聖羅倫素，自然谷住道氣。競賽隊近期狀態相當唔錯，唔計對葛度爾古斯場波，近5場攞到3勝2和，今仗雖有前鋒白賴仁費南迪斯因藥檢「肥佬」要停賽，但球隊攻擊點甚多，回師主場相信可繼續交出好成績。

甘拿斯亞態沉難有作為
甘拿斯亞近期表現有下滑迹象，球隊近3場未贏過之餘，仲只係入得1球，可見攻擊火力嚴重不足。甘拿斯亞日前喺阿根廷盃16強輸畀沙士菲宣布出局，狀態認真麻麻，今仗仍有後防主力列捷特因傷無法上陣，加上作客戰績一般，相信都係難有作為，讓球盤競賽會小讓平半，當然捧上盤啦！