日本聯賽盃今日上演8強次回合，其中名古屋鯨魚會喺主場對大阪飛腳，雙方首回合打成1比1未分高下。不過呢對歡喜冤家近年交鋒絕大多數開大盤，以中位數2.5球計，鯨魚過去11次主場對飛腳更全部開入球大，當中近5次有4場總入球更達到4球或以上，包括日前日職贏飛腳3比2。今仗屬生死戰，雙方勢必豁出去，更有利製造入波，大盤開出機會相當樂觀。

（有線61及201台周日晚6時30分直播）

鯨魚今屆日聯盃演出起伏不定，唯一「穩定」嘅係保持有前冇後踢法，當中6場日聯盃分組賽入咗12球但失11球。至於喺聯賽就9戰入14球失15球，贏過勁旅飛腳同浦和紅鑽，但亦曾吞橫濱水手3蛋，以及2比5大敗喺廣島三箭腳下。鯨魚呢種入得又失得嘅風格，搞到球隊成績麻麻，但喺博彩角度嚟睇，就屬長追入球大嘅「恩物」。

上屆日聯盃冠軍飛腳，恃住擁有遠藤保仁、安達臣柏德列等進攻好手，就算作客都照搶攻，近5次客戰就有4次開大，包括7月作客2比3輸畀鯨魚。飛腳喺嗰場波半場領先兩球下最終倒輸收場，可見呢兩支傾向進攻嘅球隊交鋒，臨場變數比較多，賽果往往出人意表，所以捧入球大比較划算。

天鵝做紅鑽「細」界
另一場8強次回合，浦和紅鑽主場對新潟天鵝，首回合天鵝大勝5比0，晉級高唱入雲，預料今仗力保領先優勢為主，或者會採用拉布戰術。紅鑽難以收復失地，爭勝鬥心成疑，球隊近6次主場對天鵝有5次開細，加上今仗幾乎已經係「例行公事」，相信入球唔會多，所以揀細盤。

（有線64及203台周日晚6時直播）