「真正強者」無堅不摧，遇弱或會手下留情；「弱雞殺手」無幾何威，有得數自然數番夠本！歐國外E組，英格蘭作客對弱旅聖馬力諾，贏波就可提前取得決賽周入場券。隊長朗尼只差1球就追平英格蘭最多入球紀錄，實會加多兩錢肉緊，加上英軍對上5次遇聖馬力諾最少贏5球，大細中位數4.5球照捧大盤。

（有線61及201台周日凌晨零時直播）

港人至愛英格蘭，雖然球迷眾多，但最「死硬」粉絲都會承認愛隊非世界一線，但「三獅兵團」今屆勝在夠運，外圍賽抽得上上籤，同組對手不強，間接造就球隊至今6戰6勝，合共轟入18球，氣勢一時無兩。由於英格蘭已領先第3嘅斯洛文尼亞9分，而且早前主客2鬥斯軍全勝，喺同分先計對賽嘅賽制下，只要英軍今仗贏波，外圍賽剩餘3輪，足以肯定取得小組頭兩名直接出線資格。難得可以威威，英軍當然想大勝一場完美晉級。

三獅炒慣聖馬力諾
有留意本季英超，都知朗尼表現不知所謂，不過佢喺日前歐聯附加賽曼聯對布魯日嘅次回合就打破入球荒演出「帽子戲法」，面對弱旅確有一手。之前英軍5場外圍賽，朗尼都有波入，國家隊入球已累積48球，只要多入1球便可追平名宿卜比查爾頓保持嘅最高入球紀錄，以聖馬力諾嘅級數，朗尼要一舉超越「卜比Sir」亦唔難。

今次英格蘭大軍有不少新血，李斯特城前鋒占美華迪、史雲斯中場舒維爾有機會落場都要極力爭取表現，鬥心毋須懷疑。英格蘭對上3次鬥聖馬力諾全勝，最少起碼贏5粒，大細中位數雖調高至4.5球，大盤可支持。

同組另一場較遲開波嘅賽事，瑞士主場迎戰斯洛文尼亞。排第2嘅瑞士現以3分領先第3嘅斯洛文尼亞，只要今場贏波，出線前景一片光明。今次瑞士點兵精銳盡出，利華古遜前鋒美密迪、慕遜加柏中場格列沙加及禾夫斯堡後衞列卡度洛迪古斯均入選，斯洛文尼亞仍以老將路華高域擔大旗，實難抱太大期望，瑞士讓半一捧上盤。

（有線64及203台周日凌晨2時45分直播）