今晚除咗國際賽做主打外，查實仲有其他聯賽冇得抖繼續打，包括英甲直播賽事修安聯主場對彼德堡，雙方近況都曳爆，修安聯之前五仗有四場食白果，彼德堡亦連場不勝勁曳，見到都唔開胃，呢種累鬥累場合邊隊都捧唔落手，揀入球細好過。

（TVB 301周六晚7時05分直播）

以排名嚟計，排第十八嘅彼德堡同位列二十嘅修安聯分屬難兄難弟，後者唔單止開咧後連盃賽六戰未贏過，之前五仗有四場冇士哥，最慘係前鋒路爾亨特仲未好番，呢支升班球隊於進攻方面難望有起色。彼德堡亦唔好得幾多，計埋英聯盃同英錦標接連出局，近五仗不勝兼輸咗四場，若果齋計作客更加錄得五連敗，同樣曳到冇朋友，就算受讓亦捧唔落手。阿King本來呢場冇乜心水，不過睇埋賠率，入球細仲有1.77倍都幾筍，以雙方咁弱雞嘅狀態，今仗唔慌多波入，一於捧細盤。

華素爾主力回歸可反彈
至於英甲「一哥」華素爾主場對貝利，雖然前者於周中英錦標爆冷畀低組別球隊摩甘比踢出局，但比起上周六豪贈黑池四蛋嘅聯賽陣容，佢哋一共收起咗六名主力，包括弗爆射手梳亞斯，擺明hea踢了事，預計今返聯賽對貝利會嚟個「華麗轉身」，小讓平半不容錯過。最後美職聖荷西地震主場硬撼費城聯，地震前鋒恩洛辛艾馬加拉同後衞佐敦史超活因傷缺陣，費城聯嘅中場占美麥洛連亦唔出得，佢哋近六聯賽五開半場和，值得追多鋪。

（TVB 302周日早上10時30分直播）