世界盃冠軍德國人才濟濟，不過自從上年揚威巴西後成績大跌，目前喺歐國盃外圍賽D組只排第2位，今晚佢哋主場迎戰榜首波蘭，以德國近期狀態同心態未必贏到，由羅拔利雲度夫斯基領軍嘅波蘭，今場和波都有着數，肯定大玩穩守突擊，波蘭3.7倍「讓球客勝」穩陣呀！

（有線61及201、中央5台周六凌晨2:45直播）

德國上年10月首循環賽事作客0:2輸畀波蘭，之後主場對愛爾蘭又失分，只係贏直布羅陀同格魯吉亞2支魚腩，或者因為小組頭2名都可以出線，德國班巨星拚搏精神似乎大不如前，踏入今年嘅熱身賽亦曾打和澳洲同埋輸畀美國，世界冠軍嘅霸氣已經蕩然無存。

德國下周硬撼蘇格蘭
領隊勒夫今次點兵冇乜新意，利物浦中場安利簡恩首度入選，但影響力有限，中場核心奧斯爾亦受膝傷困擾，隨時就住嚟踢。而且德國近3次對住波蘭得2和1負，德國踢完今仗之後，仲要分心下周一作客對蘇格蘭嘅硬仗，相反波蘭只係主場迎戰直布羅陀，今場作客德國可以盡情拚搏。

波蘭多德甲兵熟晒路
事實上波蘭近年成績唔錯，近10場國際賽事5勝5和保持不敗，前線雙箭頭羅拔利雲度夫斯基同米利克都處於巔峰狀態，「羅拔仔」近8次為國家隊上陣入8球，絕對係德國防線心腹大患。何況波蘭仲有比薛斯基、巴拉斯塞高斯基等多名德甲兵，對德國隊自然瞭如指掌啦，保持不敗唔難。