美斯留効搏盡挽民心
阿根廷聽朝喺美國侯斯頓踢熱身賽對玻利維亞，讓2球照玩2.2倍「讓球主勝」！事關阿根廷球王美斯親口澄清，根本冇諗過退出國家隊，仲好乖咁抵達美國備戰，玻利維亞3個月前曾經喺對賽淨吞對手5蛋，加埋今場係新教練巴迪維艾素首次領軍，輸鑊勁都唔奇喎。

（開賽時間：周六早上8:30）

經過喺美洲國家盃決賽輸畀智利後，美斯暫時退出阿根廷國家隊嘅傳言滿天飛，不過大家可以放心，事關阿根廷會強陣參戰，就算希古恩、中場迪馬利亞、加雷冇歸隊，好在仲有射手美斯、阿古路、泰維斯坐鎮，每人省1粒都夠炒起對手啦。

再講吖，美斯喺西甲開咧後，連續兩場為巴塞隆拿披甲冇入波冇助攻，遇上個人近8年最差開季數據，梗係要搵人出氣，挽回民心啦！對住實力次一等嘅玻利維亞，絕對係翻身嘅好時機。

玻利維亞新帥首次領軍
另邊廂嘅玻利維亞，佢哋喺美洲國家盃後炒咗教頭馬奧利斯奧蘇尼亞，搵咗巴迪維艾素上任，今仗亦係佢首次領軍出戰，對班波完全未熟悉，將帥磨合需時。更何況佢哋喺3個月前喺熱身賽以0:5慘負阿根廷，主力射手馬些路摩連奴喺大半年前轉投中超FC長春後，狀態唔算弗，牌面輸晒，試問邊有本錢同阿根廷對撼先？