歐國外F組「一哥」羅馬尼亞今晚作客硬撼匈牙利。雖然羅馬尼亞喺F組排緊第1，但呢支「黃衫軍」其實正處於青黃不接期，不過由基利捷斯、雷特同巨人門神彭迪利蒙等組成嘅防線就有如銅牆鐵壁，今屆歐國外打咗6場只失咗1球，暫時係各隊中失球最少嘅球隊，加上佢哋僅入7球，側面反映出羅軍非常注重防守。

查實擁有賀芬咸前鋒施沙拉爾、漢堡中場史泰比、利物浦門將阿當保丹嘅F組「3哥」匈牙利亦有復甦迹象，依家只落後羅馬尼亞3分，爭取頭兩名直接出線席位仲未絕望，可惜佢哋攻力麻麻，今屆6戰入5球，而且下周中仲要作客火併排第2嘅北愛爾蘭，連續兩場硬嘢都咪話唔甘，今仗未必開波即搶。睇番匈軍近4仗3開半場和，羅馬尼亞之前8仗更7開半場和，今仗關乎出線資格，雙方初段勢必更保守，令戰情隨時處於膠着，半場和不妨追多鋪。

(周六凌晨2時45分開賽)