賓特拿「中堅」變番「中鋒」
今晚國際賽，阿King揀咗歐國盃外圍賽I組丹麥主場對阿爾巴尼亞。92年歐國盃冠軍丹麥今屆外圍賽表現唔錯，「中堅賓」賓特拿已走出事業低谷，無論國家隊或球會都屢有佳作，令人期待。兩隊現時同分，但丹麥比阿爾巴尼亞踢多一場，若然再失分，出線形勢將陷入被動，丹麥爭勝戰意較高，讓半一要上盤。

（周六凌晨2時45分開賽）

客軍靚績有「水分」
丹麥大軍人腳鼎盛，包括李斯特城門將卡斯柏舒米高、前利物浦中堅丹尼爾艾格、燕豪芬後衞西蒙保臣、熱刺中場基斯甸艾歷臣以及禾夫斯堡前鋒賓特拿。「中堅賓」近期表現醒神，當中德超盃踢至末段入波，助禾堡逼和拜仁慕尼黑，之後仲喺互射12碼射入致勝球，成為英雄。早前德甲鬥科隆又做救世主，臨尾入波打和對手。

唔好忘記，丹麥上年11月外圍賽，都係靠賓特拿梅開二度反勝塞爾維亞，佢已升呢為「射手賓」，隨時又會帶來驚喜。阿爾巴尼亞雖然4戰3勝1和，但要留意其中1場勝仗係因為對手塞爾維亞球迷搞事，被判罰輸0比3，因此成績有「水分」，不宜高估。

愛爾蘭炒起直布羅陀
同組塞爾維亞主場對阿美尼亞，塞軍對阿爾巴尼亞一役，唔止被判輸波，仲被罰扣3分，搞到依家「-2」分，已經無法出線，伊雲洛域、高拉洛夫、尼曼查馬迪等英超球星恐已無心戀戰。阿美尼亞出線機會渺茫，雙方隨時鬥Hea，揀入球細最正路。至於D組超級魚腩直布羅陀6場輸晒，失咗34球，任由對手宰割，對手愛爾蘭重召射手羅比堅尼助陣，可望大開殺戒，直取讓球客勝。