兩支啱啱喺6月踢完美洲國家盃嘅球隊，阿根廷同玻利維亞將會喺周六早上喺美國「拍跳」，為嚟緊嘅世界盃南美洲區外圍賽做準備。早前一度考慮暫時退出國家隊嘅美斯，今仗仍然喺大軍名單，相信佢會繼續出戰，以表現征服質疑佢嘅球迷。至於玻利維亞一離開高原主場，表現就會大打折扣，今仗喺美國出戰相信唔係咁易踢，隨時畀阿根廷大炒，阿謙推介讓球主勝同大盤。

（周六早上8時30分開賽）

阿根廷要挽失盃士氣
世界盃南美洲區外圍賽將會喺下個月開打，唔少南美球隊都趁住呢個國際賽空檔搵其他球隊「拍跳」，希望提升狀態迎接嚟緊嘅世界盃外圍賽大戰。阿根廷失意美洲國家盃後，國內球迷將矛頭指向隊長兼王牌嘅美斯，令呢位新球王備受壓力，更一度萌生退出國家隊嘅念頭。不過，美斯退出國家隊嘅消息其後證實係「流料」，但佢為咗再一次向球迷證明自己喺阿根廷國家隊嘅地位，今仗勢必施展渾身解數踢番場好波，一眾隊友好似阿古路、迪馬利亞等亦會盡量配合，務求令球隊大勝一仗等球迷重拾信心。

6月贏過玻利維亞5球
玻利維亞喺美洲國家盃8強被淘汰出局，球隊戰鬥力雖然唔算太差，只係遇上強隊同失去主場之利就會大打折扣。玻利維亞今次點兵同美洲國家盃嘅陣容差唔多，陣中最具名氣嘅係踢緊中超FC長春嘅前鋒馬些路摩連奴，此子雖然喺美洲國家盃入咗兩球，但呢兩球都係十二碼，似乎唔能夠證明佢有幾多料，今仗面對阿根廷防線相信唔易入到波。阿根廷同玻利維亞今年6月曾經踢過友賽，當時阿根廷憑阿古路大演「帽子戲法」同迪馬利亞梅開二度大勝5比0，今仗大有機會歷史重演，讓球主勝同大盤都值得支持。