歐國盃外圍賽今晚戰火重燃，A組名牌兼上年世盃季軍荷蘭，將於主場硬撼呢組榜首冰島，亦係被扶正嘅白蘭特首度領軍，佢特登提升洛賓做正隊長，土超雙星尹佩斯及史奈達又翻生，梗係想大勝省靚塊招牌，兼爭取頭兩名直接出線席位，不過冰島做得「一哥」絕非善男信女，面對荷蘭主攻，反而啱晒佢哋打反擊，轉玩大盤更佳。

（有線61及201台周五凌晨2時45分直播）

洛賓初做隊長唔衰得
原任助教嘅白蘭特於7月接替希丁克擔大旗，並同雲尼斯達萊及雲巴士頓兩位星級副手領導荷蘭，這支歐洲勁旅暫時於A組排第3，落後榜首兼今仗對手冰島5分，要爭頭兩名直接出線資格不容再失。新帥白蘭特執掌第一擊即刻有運行，唔單止可同囝囝戴利白蘭特拍住上，星級翼鋒洛賓亦告傷愈，白蘭特仲提升呢位拜仁球星為正隊長，首騷當然唔衰得。

至於上季跌Watt嘅中場史奈達，今季於土超班霸加拉塔沙雷明顯弗番，而尹佩斯轉戰另一土超勁旅費倫巴治後亦火速重拾射門鞋，依家退居副隊長冇扁嘴之餘，反而仲減輕咗佢壓力添。兩大攻擊重心重新撻着，加埋洛賓同曼聯「新C朗」迪比雙翼齊飛爆到你暈，難怪白蘭特賽前揚言會大踢433陣式，擺明要強攻搶3分。

冰島火力更勝主隊
冰島堪稱今屆歐國盃外圍賽嘅最大驚喜，在前瑞典隊教頭拿格碧克帶領下，喺A組6戰5勝1負排第1，包括贏過荷蘭同捷克等勁旅，雖然最出名嘅老將古莊臣仍然入選，但史雲斯進攻中場基菲爾施古臣已經成為新Icon，佢作為前場自由人非常sharp醒，拍住轉戰法甲嘅箭頭史基賀臣威脅力大，冰島今屆外圍賽入咗14粒仲多過荷蘭，上次主場擊敗「橙衣軍團」，基菲爾施古臣更包辦晒兩球。面對荷蘭主攻，啱晒佢哋打快速反擊，預計入波唔會少，大盤有1.68倍咪嫌少。