歐國盃外圍賽H組賽事，歐洲名牌球隊意大利主場鬥馬爾他，兩隊強弱懸殊，意軍自然被睇好可輕易贏波。不過，意大利欠缺優質前鋒，面對存心死守嘅馬爾他唔易大勝。翻查往績，佢哋近3次對馬爾他都係小勝對手開細盤，今場大細中位數調至3.5球，再追入球細。

（有線62及202台周五凌晨2時45分直播）

意大利目前以6戰3勝3和得12分排喺H組第2成績唔錯，但呢班波欠缺高產射手，今屆外圍賽6戰入9球竟分別由6個球員建功。意大利舊年10月主場對阿塞拜疆，只憑中堅基亞連尼梅開二度先贏2比1，反映球隊前線鋒力不足。

馬爾他唔係「魚腩」
馬爾他位處意大利西西里島南部，分組賽6戰得1分排榜尾，似乎無咩戰鬥力，但呢班波絕非「無骨魚腩」。馬爾他今屆分組賽作客克羅地亞輸0比2，造訪保加利亞更爆冷以1比1賽和對手，顯示球隊紀律性高並非任人魚肉。

另外，馬爾他近年對親意大利，踢落都唔怯場，兩隊首循環對決，馬爾他喺主場只係輸0比1。兩軍喺2014年世界盃外圍賽曾兩度碰頭，當時意大利兩戰皆贏2比0。今場預期意軍會控制戰局，但要撕破馬爾他嘅防線亦唔易，大勝機會唔高。