日聯盃8強開波
日聯盃8強首回合今晚開戰，大阪飛腳喺主場對名古屋鯨魚，玩入球大穩陣，事關飛腳有4個日本國腳缺陣，當中有3個係防線球員，加上名古屋教練西野朗領軍倒戈鍾意玩對攻，相信今場比賽唔會出現悶波。
（有線61及201周三晚6:00直播）
飛腳後防穿大窿
除咗王牌宇佐美貴史，飛腳仲有後衞米倉恒貴、丹羽大輝同門將東口順昭被日本國家隊徵召，意味要搵副選撐場。大家知啦，進入次階段後飛腳個後防都幾唔掂，9場波失咗12球，比起首階段17場先失13球，簡直係兩個世界，家陣冇埋3個防線主力，都好難想像佢哋可以保持清白，惟有寄望射手安達臣柏德列，交到功課可以喺首回合領先啦！
另一方面，名古屋都有前鋒永井謙佑入選日本國家隊，中鋒路華高域為斯洛文尼亞國家隊服役，不過陣中最具威力嘅射手川又堅碁，今次並冇入選日本國家隊，有佢孭飛唔怕冇波入。最重要係，西野朗領軍倒戈習慣同飛腳鬥攻，對上4次交手有3次開入球大，今場值得再追。
