省長開聲力撐
澳洲足總盃16強有直播睇，地區球隊洛克達爾太陽今日喺主場對墨爾本勝利，出動埋新南威爾士省省長貝爾德開聲力撐，睇怕唔會咁易扯白旗投降，既然勝利喺上一圈大勝冇留手，即使今場大細開到3.5球，都係追多次入球大穩陣！

（有線64及203周二下午5:30直播）

洛克達爾太陽陣中有唔少昔日澳職球星，例如射手戴蘭麥阿里士打、馬高積錫同門將尼薛夫斯基，佢哋上一圈主場以3:1砌低珀斯SC，並唔係撞彩，今場難得遇到上季澳職總冠軍墨爾本勝利，會方當然希望吸引8,000個球迷入場，新南威爾士省省長貝爾德出席活動嘅時候，仲加入聲援陣營添！

首席射手貝利沙候命
就連洛克達爾太陽都咁重視呢場波，勝利梗係唔會揸流攤啦，佢哋喺上一圈作客以6:0掃低巴爾曼老虎，雖然前鋒巴巴路西斯被新西蘭國家隊徵召，但首席射手貝利沙冇入選阿爾巴尼亞國家隊最新大軍名單，能夠候命出戰，相信可以繼上一圈先開紀錄後，再有好表現，玩1.72倍入球大應該最穩陣。