朗尼破入球荒 高美斯腳風順
開咧後愈踢愈好嘅曼聯，今晚英超將作客喺開季後保持不敗嘅「天鵝」史雲斯。「紅魔」隊長朗尼日前喺歐聯附加賽打破入球荒，仲要一入就3粒，今晚佢同史雲斯箭頭巴菲迪比高美斯大鬥法，後者開季至今場場有波入，既然兩隊射手都咁入得，梗係揀2.1倍「大」啦！

（now621台周日晚11:00直播）

歐聯附連中三元 魔童信心返晒嚟
曼聯喺歐聯附加賽兩回合計大炒布魯日7個1皮，順利晉級分組賽之餘，仲幫朗尼、迪比一班射手磨利把刀！「魔童」朗尼早前被怒轟冇貨交，喺歐聯附打破跨季10場入球荒後，信心肯定返晒嚟！新加盟嘅「小豬」舒韋恩史迪加亦都開始融入隊波，同班隊友踢得愈嚟愈夾，家陣「紅魔」上下士氣高昂，食住個勢有力射爆史雲斯大門！

高美斯弗到震 3場英超省3粒
另邊廂，史雲斯上季超額以第8名衝過終點，佢哋今季表現繼續令人驚喜，由開季至今都未輸過。佢哋先喺史丹福橋球場以2:2逼和車路士，之後主場兩球淨勝紐卡素，上輪作客新特蘭亦以1:1握手言和，當中箭頭巴菲迪比高美斯更係每場都有1球進帳。如果計埋佢哋喺英聯盃大炒約克城3:0，佢哋已經喺各項賽事拎到2勝2和不敗嘅佳績。

史雲斯前鋒巴菲迪比高美斯腳風極順，「扭波王」謝法臣蒙迪路更係逢人過人，何況今晚佢哋有主場之利，相信要入波絕對唔難！計近況同狀態，兩隊都不相伯仲，若然揀主客和好似唔夠穩陣，既然「紅魔」同「天鵝」近期腳風超順，係咁入波，不妨追捧大盤啦！