意甲嚟到第2周就上演重頭大戰，由上季冠亞軍球隊對壘，羅馬會喺主場惡鬥祖雲達斯。兩軍開咧首戰都失分，今仗自然希望贏波重振聲威，加上一眾新球員力求爭取好表現，相信會踢得非常搏命，阿King估計今場入波唔會少，大盤有2.29倍值得一試。
（TVB 301周一凌晨零時直播）
羅馬上仗作客維羅納，最終憑費奧倫斯嘅入球以1比1逼和對手。由於維羅納人腳同狀態都唔差，所以主帥魯迪加西亞唔覺得失望，仲對前鋒迪斯高同翼鋒穆罕默德沙拿兩個新兵嘅表現感到滿意，相信佢哋之後嘅賽事會有更好發揮，今仗強陣出擊有望攞到入波。
祖雲達斯今夏放走前鋒泰維斯、中場維達爾及派路，球隊似乎需要時間適應，結果喺首場聯賽主場迎戰烏甸尼斯，就輸0比1爆出大冷門，同時係「祖記」近48場意甲主場比賽首度輸波。不過，教練阿里基強調球隊表現唔差，加上日前成功喺波圖同車路士借到後衞阿歷士辛度同中場古達度，為求一洗首仗落敗嘅烏氣，今仗肯定會踢得更進取。
