蘇爾達杜踢爭氣波
「西甲星期五」 戲碼唔弱，維拉利爾今晚喺主場對愛斯賓奴，有機會繼續上演「廢柴翻身戰」，因為維拉利爾新簽入嘅射手蘇爾達杜，回歸西甲首場比賽已經有波入，自信心返晒嚟，愛斯賓奴未夾熟好易出事。

（now632台周六凌晨2:30直播）

愛斯賓奴星散 靠二打六頂檔
曾經係西班牙國家隊希望嘅蘇爾達杜，去到英超變成廢人，就算佢想走，都冇乜球隊夠膽接收。好喇，終於等到維拉利爾肯接收喇，蘇爾達杜出席球迷見面會竟然兩次將原本送畀粉絲嘅波，踢到唔知去邊，成為全世界笑柄。好在，蘇爾達杜畀人笑完後，開咧戰入波幫維拉利爾以1:1打和貝迪斯，今場肯定想入波證身價。

對家愛斯賓奴喺休息期間賣走唔少主力，包括後衞赫達摩蘭奴轉投燕豪芬，門將卡斯拿轉投皇家馬德里，但因為財政問題，根本冇真金白銀收購過新球員，唔係借用，就係以免轉會費形式羅致新球員頂檔，即使佢哋喺季前賽表現唔錯，喺開咧戰又以1:0砌低基達菲，橫睇掂睇都唔值得再追。