迪布尼心事重重
今晚德甲有場好戲上演，由禾夫斯堡主場鬥史浩克04。呢兩支德甲勁旅開季同樣取得1勝1和，亦同時分別輕鬆殺入德國盃第2圈，表現算對辦。之不過近日禾夫斯堡受到主力奇雲迪布尼離隊消息影響，內部軍心難免動搖，更何況「狼堡」近年對史浩克都佔唔到咩甜頭，呢鋪就算主場出擊都撐唔過，1.85倍讓客抵玩。

（now670台、有線61及201周六凌晨2:30直播）

德國《圖片報》透露，禾夫斯堡已經同曼城就奇雲迪布尼轉會一事達成協議，據悉「藍月亮」開出高達8,000萬歐元（約7億港元）轉會費搶人，更有傳呢位24歲中場發電機即將飛去英國進行體測。就算奇雲迪布尼可以踢埋呢場波先走，怕且佢都會勒住費事受傷，「狼堡」嘅鋒力難免大打折扣。

增兵雄心壯志 史浩克目標入前3
雖然「狼堡」星級翼鋒舒賀爾尼重返大軍，不過呢位德國國腳自年初來投後，始終未能發揮應有水準，至今只係為「狼堡」攻入1球，唔似幫到手。就算主力射手巴斯杜斯開咗齋，獨力難支，好難砌低史浩克啫。

反之，史浩克04今季搵咗新帥比騰列達執教，力求入前3爭取下屆歐聯席位，同時分別引入阿根廷前鋒迪山度、德國中場新星祖漢斯基斯，又拒絕賣走中場達斯拿同守將哥拉辛拿斯，雄心壯志，呢鋪直接硬撼歐聯席位競爭對手，又點可以失威？最關鍵係，呢班波對上10次鬥禾夫斯堡，8次至少保住唔輸，有埋往績支持，可以安心捧場。