紅魔搵布魯日祭旗

如果曼聯今場歐聯外圍賽附加賽次回合作客擊敗布魯日，肯定好多人出嚟抽水：原來「紅魔鬼」上場英超主場同紐卡素打和就係為咗留力打今場！不過科娜就想講句公道話，英超依家真係冇乜弱旅，曼聯贏唔到「找卡數」一啲都唔出奇喎，但佢哋依然畀人瘋狂恥笑，呢班紅魔依家谷住谷住，今場作客比利時砌布魯日，無論係為面子定為錢都好，點都要贏波，捧客勝！

（有線61及201台周四凌晨2時45分直播）

曼聯首回合於主場以3比1擊敗布魯日，贏得都幾輕鬆，除咗呢場波，其實「紅魔鬼」喺英超嘅表現一直畀球迷插爆，3場波入得兩球，隊長朗尼更被寸放緊working holiday。不過從另一個角度睇，英超嘅競爭性一年比一年大，各支球隊為留喺呢個識生金蛋嘅聯賽，都不惜使錢增兵，以紐卡素為例，佢哋今夏就使咗超過4,600萬鎊（約5.6億港元）去買人增強實力，曼聯要贏唔再係理所當然。況且「紅魔鬼」上場對紐卡素都叫壓住對方嚟打，朗尼仲有球突破越位單刀射破對手大門，但就因為旁證發雞盲判入球無效，所以曼聯最尾贏唔到係幾唔抵。

布魯日殘陣難逞強
攞布魯日嚟同紐卡素、史篤城呢啲英超中游球隊嚟比，布魯日係唔夠佢哋砌，呢隊波攻力有限，今場想絕地反擊恐怕只怕有心無力，加上佢哋今場陣容嚴重不整，隊長添美西蒙斯、中場高普文、後衞比祖恩安高斯等均因傷缺陣，中堅米希利則要坐波監，今場面對實力高幾班、又要急於證明自己嘅曼聯，輸波好正常喎！

今場關乎「紅魔鬼」能否取得價值1400萬歐元（約1.25億港元）歐聯分組賽入場券，佢哋即使有兩球優勢在手，亦都唔會掉以輕心，早早解決對方，免留後患。參考曼聯以往四次參加歐聯外圍賽成績，當中有三次在次回合均取得大勝，好似03年主場大炒沙勒格斯基5比0、06年作客迪比辛贏3粒，今場客勝堅係捧得過！