今日仲有兩場亞冠盃8強首回合大戰，韓職「一哥」全北汽車主場迎擊日職豪門大阪飛腳，全北雖然地利、實力兼備，但係教頭崔康熙轉換新戰術唔多成功，有啲兩頭唔到岸，不妨博吓個2.05倍半場和。

（now671台周三晚6:00直播）

全北家陣响韓職帶緊頭，公認係南韓至強勁旅，但係响東亞盃舉行嗰段職賽空檔，佢哋因為攻擊鐵三角之一嘅外援艾杜，上月初突然轉會中甲河北華夏，前鋒線要從頭執過，崔康熙亦趁機會改變全北嘅踢法，希望由過去嘅進攻足球，變成攻守兼備，有時仲打單箭頭添，咁變法肯定就係為咗响亞冠盃爭霸。可惜吖，佢變咗個大頭佛出嚟，8月4場韓職得2勝2負，當中淨吞浦項3蛋輸得最肉酸，好明顯班球員仲未適應到套新戰術。

飛腳人腳唔曳索晒情報
當然，照秤人腳全北同飛腳半斤八両，佢哋有李在城、李根鎬、路易斯、「獅子王」李東國以及由米蘭迪斯新簽番嚟嘅烏高維拉，攻擊力唔存在問題，何況仲係主場出擊添，問題在於崔康熙肯唔肯簡單啲，踢番以前嗰家進攻足球，唔好再船頭驚鬼，船尾驚賊咁保守。

而且飛腳班人對全北主將好了解，例如李根鎬响大阪踢波嗰陣，擔任韓語翻譯嘅安東太昊，依家就係飛腳強化本部嘅要員，安東直情話李根鎬近幾場波，喺度摸索融入全北嘅新體系，顯而易見飛腳做足晒情報工夫，佢兩隊半場分唔到勝負有乜出奇，更何況全北唯一一次主場對飛腳，半場就係1:1收工。