依家愈嚟愈多猛人空降美職，但除咗睇星之外，查實美職入波夠晒多，娛樂性豐富，聽朝就有場東岸嘅榜尾芝加哥火燄主場對「二哥」紐約紅牛，兩軍交手例牌多波入，1.68倍嘅大盤有買趁早！

（TVB 301周四早上8時30分直播）

紐約紅牛落後東岸榜首華盛頓聯隊五分，但其實紅牛比對方打少四場，依家佢哋為搶「一哥」之位開行Turbo，王牌射手巴利胡禮菲臘斯繼續勒唔住，過去四場有三仗都有士哥，今場對住近四場輸足三場嘅火燄，又係起筷好時機！火燄今場有後衞艾達頓掛免戰牌，不過無論呢位巴西守將係咪缺陣，火燄對住紅牛都慣性開大，近五次碰頭有三次開出大盤；雙方亦喺2013年交鋒合共炮製七個士哥，睇嚟今場大盤走唔甩喇！

急流捲唔走戴拿模
尾場由科羅拉多急流主場迎戰侯斯頓戴拿模，呢兩支西岸球隊近況一般，急流更衰到排喺聯賽榜尾二，最弊係呢班波火力為美職最弱，開咧至今入得廿一球，只得三次單場入多過一粒，況且戴拿模近五次交手錄得一勝三和一負，試問急流仲有乜本錢讓波呢？梗係捧戴拿模讓球客勝喇！

（TVB 302周四早上9時直播）