今晚歐聯附重頭嘅戲碼，當要要數法甲勁旅摩納哥主場硬撼華倫西亞，首回合輸1比3嘅摩納哥日前聯賽留晒力，今仗急於收復失地勢必搶攻，可惜撞正作客法國特別Sharp醒嘅「蝙蝠兵團」，谷得太上隨時輸反擊，斯維認為華倫至少能全身而退，加上仲有得受讓咁筍，讓球客勝咪走寶。

（有線61及201台周三凌晨2時45分直播）

主力抖足搏呢場
雖然落後兩粒，但首回合靠柏沙歷搶到一個價值連城嘅作客入球嘅摩納哥，想殺入分組賽，今仗要喺唔失波情況下贏華倫兩球或以上。呢支上屆淘汰阿仙奴殺入8強嘅法甲勁旅，日前喺聯賽作客逼和圖盧茲一役特登收起柏沙歷、安東尼馬迪爾、艾雲卡華利路及貝拿度施華等中前場主力，擺明留力砌呢場，預計冇得諗咁多嘅摩納哥一開波即刻火力全開，力圖盡快收復前失。不過你精我都唔笨，同樣喺日前聯賽和波嘅華倫西亞，冇畀主力柏高艾卡沙、洛迪高摩連奴、安素佩雷斯擔正，連同本身要坐波監嘅柏利祖、菲侯利、荷西加耶變相有得抖，養精蓄銳搏今仗。

作客法國9成不敗
睇番紀錄，原來華倫過去10次喺歐洲賽出征法國，錄得4勝5和1負，不敗率高達9成，適逢摩納哥要搶攻谷得太上，更有利華倫打反擊。如「蝙蝠兵團」能殺退摩納哥，可為西甲創造歷史，首度有5支來自同國球隊（巴塞、皇馬、馬體會及西維爾）躋身歐聯分組賽，為名為利必定搏盡，讓球主客和華倫受讓一球，讓球客勝乃不二之選。