主將話明有仇報仇
亞冠盃8強首回合今日開打，2013年冠軍廣州恒大淘寶（足智彩譯FC廣州）客場挑戰日職勁旅柏雷素爾，雖則恒大近期缺少咗兩年前嘅霸氣，贏都好難清風送爽，由於呢兩班波過往4次交手開咗3次大，都係博1.8倍入球大穩陣啲。

（now671台周二晚6:00直播）

從往績去講，恒大4戰柏雷素爾3勝1和未輸過，個勢似乎食硬對手，尤其13年兩回合炒起柏雷素爾8:1，更被對方視為奇恥大辱，一直處心積慮想報仇，可以預見恒大今日面對嘅唔只係一隊波，話係一隻受傷嘅獅子都得，柏雷素爾主將工藤壯人、守衞藤田優人都走出嚟發表復仇言論，就反映到佢哋嘅心態。

兩年前慘敗1:8
如果齋計人腳，有鋒將艾傑臣養傷嘅恒大，實力起碼高柏雷素爾半班，而且佢哋非常聰明，唔聲唔聲買咗2,300張飛送畀擁躉遠征日本打氣，柏雷素爾個主場先得15,000座位，恒大Fans佔咗近20個巴仙，嗌起上嚟聲勢未必輸蝕，柏雷素爾嘅主場優勢唔一定係想像中咁強。

但係恒大响主帥納比退休唔教，經歷咗簡拿華路揸旗之後，成隊波跌咗Watt，依家史高拉利上場冇耐，有改善但唔算明顯，所以期望恒大學似兩年前咁炒起柏雷素爾唔多實際，反而可以諗吓入球大，事關呢兩班波都屬於後勁凌厲嘅球隊，完場前廿幾分鐘入波比較多，半場博細，全場博大係個唔錯嘅投注策略。