今晚英超壓軸好戲上演傳統大戰，由阿仙奴坐鎮主場火併利物浦，兵工廠嘅「銀河唯一」基奧特雖上仗開齋，但表現依然備受抨擊，而且傳出球隊快將簽入PSG神鋒卡雲尼，「銀河唯一」誓要爭取士哥保地位，紅軍主帥羅渣士一向好「大」喜「攻」唔識守，新加盟嘅中鋒賓迪基逐漸入局，兩大神鋒大鬥射術實多波入，雙方碰頭常演大騷，入球大有買趁早。

（now 621周二凌晨3時直播）

阿仙奴箭頭基奧特一直被批評唔夠班，有粉絲認為枉有助攻王奧斯爾壓陣，卻唔能夠轉化更多入波，矛頭直指基奧特把握力唔夠好，儘管「銀河唯一」上仗對水晶宮開齋入靚波，但除此之外成場波冇晒影，傳媒嘲笑佢係「進攻終結者」，指每次攻勢落到佢腳下總會斷纜，因此今夏不斷傳出會斟皇馬前鋒賓施馬過檔，近日更有指PSG神鋒卡雲尼快將加盟添。如果卡雲尼真係入「廠」，同樣打中鋒嘅基奧特一定冇碇企，為保正印地位，梗係要火力全開，爭取更多士哥氹主帥雲格喇。

近3次英超交鋒共入15球
另一邊廂，頭兩仗贏晒嘅利物浦，主帥羅渣士明顯吸收上季賣走蘇亞雷斯同史杜列治長期養傷下，其他前鋒如巴洛迪利、波連尼冇貨交的教訓，今夏斥資3250萬鎊高價羅致維拉中鋒賓迪基，並加入奧歷治同羅拔圖法明奴重組攻擊線，羅帥嘅戰術偏重進攻，其中賓迪基逐漸融入球隊，同前場隊友菲臘比古天奴、拉爾拉拿等愈來愈夾，賓迪基有身形hold到波兼具衝刺力，上仗對般尼茅夫取得加盟後首個士哥，勢必令佢信心大增。

可惜，紅軍陣中無論係盧卡斯、佐敦軒達臣、占士米拿、祖阿倫均非掃蕩型防中，防線上冇硬淨屏障保護下，使紅軍總係有前冇後唔識守，隊長佐敦軒達臣因傷上陣成疑，點頂得住阿仙奴嘅基奧特、奧斯爾同阿歷斯山齊士進襲呢？既然係咁，紅軍隨時索性以攻代守，睇番兩軍近3次聯賽交鋒，總共炮製15個士哥，斯維寧願轉捧入球大。