Yennie啱啱由捷克布拉格飛返英國，今晚就去英國酒吧睇波，感受吓外國氣氛！英超開咧表現最Sharp醒一定係開季兩連勝嘅曼城，今晚佢哋造訪傷兵滿營嘅愛華頓，無論實力、人腳同近況都佔優，「藍月亮」讓半一，我信佢哋可以食住個勢連贏3場，撐1.87倍上盤！

曼城近年保持住開鑼必勝走勢，今季首兩戰唔但止贏波，仲分別大炒西布朗同衞冕冠軍車路士3粒，個勢勁到不得了。曼城近2季都用同一班底，招數一早畀人睇穿晒，正因為咁，「藍月亮」今季以天價羅致史達寧，呢位「反骨仔」上場表現對辦，相信可以繼續為曼城帶嚟火花。

薩巴列達打柴 沙格拿頂上一樣掂
雖然右閘薩巴列達喺操練嗰陣整親膝頭哥韌帶，至少要抖成個月，但頂上嘅沙格拿新季狀態唔錯，上場仲嘜到夏薩特冇晒料到，加埋會方啱啱從華倫西亞簽入阿根廷守將奧達文迪，後防大把人畀比歷連尼調動。前面就更加唔使擔心啦，阿古路上仗已開齋，耶耶托尼新季亦鹹魚翻生，「藍月亮」有前又有後喎！

愛華頓表現反覆 史東斯要求轉會
對家愛華頓上季以第9名衝線，係近9季以嚟成績最差嘅一季！今季「拖肥糖」表現反覆，開鑼戰失分畀新升班嘅屈福特，跟手又以3:0大炒修咸頓，認真估佢哋唔到。中場吉遜、派拿同左閘巴尼斯仲養緊傷，新星史東斯又話遞交咗轉會要求希望過檔車路士，好影響軍心，今鋪有地利都唔值得睇好。