阿甲今季無喇喇改制，由20隊一次過加到30隊，好多球隊都唔知乜頭乜路，賭仔揸住份波經排位，真係唔知點揀。其實嗰邊搞咁多嘢，都係個錢字，賽會可以搵多啲直播錢，不過，亦令到好多無厘頭球隊爆冷。

遠嘅唔講，近近哋就講上輪，排包尾第30位嘅新芝加哥，19輪未贏過之後突然開竅，3比0擊敗颶風隊，正路睇績睇近況肯定跣到直一直，阿甲太多不明物件出現，未知各軍幕後想點玩，始終跟番幾支出名嘅較為穩陣。

上次輸在長途旅程
睇中場學生隊主場對河床，河床上仗主場畀聖馬田聖祖安爆冷擊敗，其實係因為佢哋之前去咗場畀面派對，參加咗贊助商喺日本搞嘅盃賽，以佢哋南球盃盟主身份對日聯盃冠軍大阪飛腳，球隊飛足17個鐘，中間喺歐洲轉機又要等24粒鐘，雖然部分主力冇去，但點講都有影響，之後返番阿甲輸波情有可原。今場作客學生隊，河床抖足晒，應該可以嚟料，上場輸波退咁啲熱，只係讓平半，河床上盤抵玩。（周一早上8時30分開賽）