今周連西甲同意甲都揭開戰幔，加埋已經開打嘅英超、德甲及法甲等聯賽，喺咁熱鬧氣氛帶動下個市愈來愈旺，預計投注額會不斷上升，不過上季輸得勁甘嘅大戶，今季變得相當謹慎，賽前依然紋風不動，暫時都未收到風佢哋諗住玩乜，不過肥叔亦做足功課，今日繼續推介意甲，薩斯索羅主場火併拿玻里，薩軍受讓半一咁多值得捧場。（周一凌晨2時45分開賽）

大戶睇準至郁 否極泰來
大戶同散戶最大分別，係前者會通過好多數據、賽前收風及臨場調動，睇準機會先出手，可謂例不虛發。不過大戶上季黑過墨斗，尤其係踏入羊年之後未好過，上季埋單計數輸咗成3000萬，都咪話唔甘，因此今季做晒準備全力「跑數」，賽前堅密實不漏半點風聲，亦唔會入定貨而主力玩「走地」，好似上周英超利物浦主場對般尼茅夫，當紅軍上半場領先一粒後，即狂入般軍下盤，最終順利贏盤，肥叔都跟咗執番多少，加埋首輪車仔對史雲斯嘅下盤，睇嚟大戶已否極泰來。

既然大戶咁口密，肥叔惟有自己做功課，今日重心推介場次，係意甲薩斯索羅主場對拿玻里。拿玻里雖為意國名牌球隊之一，但自從主帥賓尼迪斯過檔皇馬後，就不斷傳出負面消息，包括陣中一些主力因賓帥走人而想跳船，難怪季前熱身賽表現咁曳喇，初盤讓半一卻勁高水，睇得出莊家對佢哋唔多夠信心，出面啲博彩公司係咁吹淡風，唔排除會轉為讓平半，趁住薩斯索羅依家仲受讓半一，呢個下盤快啲入貨。

費倫往績恰到AC
同時間舉行嘅另一場意甲費倫天拿主場對AC米蘭，「紫百合」今夏於國冠盃贏過車路士同巴塞，表現令人眼前一亮，AC雖大肆增兵，但明顯仍處於磨合階段，查實近七交手費倫天拿僅一敗，當中仲贏咗四次，有啲格食格味道，初盤「紫百合」小讓平半，上盤值得捧場。