2012年攞完法甲冠軍嘅蒙彼利埃，近年表現每況愈下，今季開咧兩戰全敗之餘更1球都入唔到，今晚主場面對億萬大軍巴黎聖日耳門（PSG），相信都係等做「炮灰」，讓球主客和PSG讓一球，阿謙會直取讓球客勝。
（TVB 302周六凌晨2時30分直播）
PSG近期錄得4連勝狀態甚弗，球隊雖有伊巴謙莫域、迪馬利亞同馬昆奴斯哥利亞因傷唔踢得，但仍能喺開咧兩場聯賽攻入3球且1球不失，全賴頂替伊巴嘅卡雲尼有貨交，配合埋馬高華拉堤、馬度迪及盧卡斯洛迪古斯攻堅，令球隊依然保持強大火力。而且PSG防線表現穩健，已經連續4場賽事都保住清白之身，橫睇掂睇都係超晒班。
蒙彼利埃喺2012年力壓PSG同里爾捧走當屆法甲冠軍，但同好多中型班一樣，球隊根本唔夠料踢歐聯，結果翌季令班波元氣大傷，之後幾季都返唔到前列位置。今夏佢哋有上季射入11球嘅首席射手巴里奧斯離隊，只靠莫尼亞同蘇利文尼卡馬拉攻堅，難怪開季首兩場聯賽輸晒之餘仲1球都入唔到，攻不銳守不穩對住如狼似虎嘅PSG，肯定凶多吉少，讓球客勝值得支持。
