呢期邊隊西甲球隊最紅？梗係畢爾包啦！佢哋捧完西超盃後今晚再上征途，歐霸盃附加賽首回合作客斯洛伐克球隊斯利納，畢爾包喺西超盃大炒巴塞隆拿4蛋，前鋒阿度里斯兩戰轟入4球，仲威過美斯，試問二流球隊斯利納點抵擋得住呢位當紅射手？畢爾包客W有1.59倍夠穩陣，甚至可吼2.8倍讓球客勝。（周五凌晨2時15分開賽）
「巴斯克雄獅」畢爾包向來屬「盃賽專家」，上季打入西班牙盃決賽不敵巴塞隆拿，但抖完暑喺西超盃再遇「地上最強」，被睇淡下兩回合計居然大勝對手5比1。唔好忘記，呢支巴斯克球隊曾於12年打入歐霸盃決賽，加上西班牙球隊近年喺呢項賽事「威過威士忌」，近6屆賽事西班牙球隊包辦咗4屆冠軍，畢爾包自然成為爭標熱門之一，要過附加賽呢關冇大難度。
阿度里斯弗爆數胡
畢爾包前鋒阿度里斯狀態大勇，西超盃兩戰巴塞都有入波，包括首回合大演帽子戲法，幫球隊打下捧盃基石。呢位34歲老將上季西甲都有18球進帳，愈老愈可愛，淨係佢一人已足以反轉斯利納防線。
至於斯洛伐克球隊斯利納只屬陪跑分子，之前兩次參加歐霸盃都係外圍賽出局，對上一次打入分組賽已經係08年嘅事。佢哋上圈對住烏克蘭球隊禾斯克拉，兩回合計只係打成平手，需要踢到加時先憑作客入球優惠驚險晉級，實力同畢爾包相差一大段距離，主場出擊都冇運行。
