英冠球隊侯城今晚深夜返到主場迎戰富咸，領隊布魯士講明要攞晒3分！點解布魯士咁大口氣？一嚟前鋒艾保靴南迪斯刑滿復出，二嚟對手富咸傷兵滿營，人腳唔齊發唔到圍，侯城2.75倍「讓主」博得過！（開賽時間：周四凌晨2:45）

侯城嘅烏拉圭前鋒艾保靴南迪斯，上季喺英超收爐戰拳打曼聯後衞菲爾鍾斯，搞到事後畀英足總罰跨季停賽3場，今仗終坐完波監。

射手艾保仔坐完跨季波監
呢位25歲射手上季喺英超表現麻麻，今夏一直盛傳會畀侯城賣走，但「老虎」一直收唔到Offer先至有得留低。不過布魯士賽前除咗講明會派呢位烏拉圭國腳出場外，仲出口護短話佢上季因未適應英國足球風格，經過一季調整後，相信嚟緊會喺英冠證明自己唔係水貨咁話。

嗰邊有位餓波射手復出，呢邊廂富咸就為兵荒而頭痕。富咸除咗前鋒阿當泰加特、中場佐治威廉斯同守將阿武列比達3名十字兵仲抖緊之外，基廉馬喺英聯盃對韋甘比場波傷埋，上場對白禮頓冇出到。人腳唔齊仲要作客，富咸只可以自嘆黑仔，作客侯城要搶分唔易。