歐聯附加賽首回合，葡超士砵亭主場迎戰俄超莫斯科中央陸軍，屬於2005年歐洲足協盃（歐霸盃前身）決賽翻版！當年莫斯科中央陸軍喺里斯本贏波捧盃，成為士砵亭奇恥大辱，今次再碰頭，一定有仇報仇。不過，中央陸軍狀態亦相當弗，入波機會高，一於捧入球大。（有線62及202台周三凌晨2時45分直播）

中央陸軍05年截胡捧足協盃
士砵亭同中央陸軍牙齒印非常深，事緣05年歐洲足協盃決賽，士砵亭難得可以喺主場比賽，以為捧盃在望，點知先開紀錄之下，反輸1比3收場，由天堂跌落地獄，成為球隊史上不能磨滅嘅烙印。相隔10年，報仇機會終於來到，肯定唔會放過中央陸軍。

雖然士砵亭有翼鋒拿尼離隊，但亦簽入哥斯達黎加前鋒拜仁雷斯，亦留住兩位射手施利文尼、費迪蒙迪路，後者上仗聯賽後備上陣踢咗20分鐘，擺明留力今場搏殺，可望攻陷對手大門。

莫斯科中央陸軍勝在俄超較早開鑼，球員已操起狀態，聯賽更加5戰全勝，走勢非常凌厲。球隊早前從羅馬借用昔日英雄杜姆比亞，呢位科特迪瓦射手曾効力中央陸軍4年幾，上陣95場勁入61球，今次回歸將大大增強球隊火力，而且省去適應時間，可以立即同士砵亭大駁火。