今晚英超獨腳戲，利物浦主場對般尼茅夫，紅軍進入「後謝拉特時代」，演出更佳，由菲臘比古天奴、佐敦軒達臣、占士米拿孭飛嘅中場線，集活力、技術、經驗於一身。兩位鋒線新兵賓迪基、羅拔圖法明奴表現對辦，進攻點夠多，新升班球隊般尼茅夫難以招架，直取利物浦讓球主勝。

（now621周二凌晨3時直播）

利物浦上季英超煞科戰，1比6慘負史篤城，但上仗開鑼以1比0擊敗對手，表現脫胎換骨。新隊長佐敦軒達臣好有領袖風範，證明自己可完全代替謝老四，菲臘比古天奴射入世界波，亦充滿「神奇、頂級、超綽」特質，令人對紅軍有番希望。

般尼茅夫英冠水準
雖然賓迪基上仗冇波入，但佢衝擊力仍為對手帶來好大威脅。羅拔圖法明奴後備上陣，亦好積極，佢擅長盤扭，可分擔菲臘比古天奴嘅工作。呢對巴西孖寶傳得又射得，令對手防不勝防。利物浦上仗圍攻史篤城至尾段先至入波，的確有啲驚險，吸取教訓後，今輪返回主場應會爭取盡快入多兩球，以免夜長夢多。

上季英冠一哥般尼茅夫首戰主場都輸畀維拉，表現唔多夠班，皆因球會財力有限，未能簽入高質素球員，以英冠班底出戰英超，睇怕冇運行。