寸王16戰爭霸勁敵未衰過
「寸王」點解寸得起？因為對親強隊特別醒！今晚英超爆發「雙藍會」，由「藍月亮」曼城主場火併「藍戰士」車路士。雖然衞冕嘅車仔首仗甩轆，不過「寸王」主帥莫連奴不嬲擅打硬仗，近兩季聯賽對爭標勁敵唔知個輸字點寫，以其快打旋風般嘅反擊速度，撞正唔識死要搶攻嘅曼城，真係合晒合尺，仲有得受讓，車仔嘅讓球客勝有買趁早。　（now 621周日晚11時直播）

上季盟主車路士喺上周首輪意外甩轆，在門神泰拔高圖爾斯被逐下遭史雲斯逼和2比2，但有睇波嘅球迷都唔會覺得車仔打少個，末段甚至有機會贏波添，失分只係冇運，今仗作客曼城毋須過分悲觀。

曼城輕出易輸反擊
車仔領隊莫連奴面對強隊特別有計，自2013年「寸王」重返車仔後，近兩季聯賽出戰阿仙奴、利物浦、曼市雙雄嘅16仗中，錄得9勝7和未輸過，尤其係作客更抱住「贏唔到都唔輸畀你」，呢種策略勁適合運用喺長途賽，只計客戰曼城亦勝和各一，上季兩鬥「藍月亮」更不惜泊大巴，唔理好醜，但求唔輸畀爭標勁敵，加上今仗由副選比高域代替停賽嘅高圖爾斯，實會踢得更保守。

相反上仗輕取西布朗嘅曼城，其領隊比歷連尼推崇漂亮足球，無論執教維拉利爾、皇馬、馬拉加時都主張進攻，過去兩季帶「藍月亮」於聯賽狂轟185個士哥，射手阿古路上季更以26球榮膺神射手。比帥冇因上季四大皆空而被炒，決定重組鋒線，今夏放走迪斯高同祖維迪，並高價簽入紅軍翼鋒史達寧令火力有增無減。不過，車仔最怕你擺鐵桶陣，適逢曼城主場出擊唔會縮，就會暴露更多空位畀王牌夏薩特、迪亞高哥斯達、韋利安等打反擊，萬試萬靈，而且有得受讓咁筍，車仔嘅讓球客勝不容錯過。