攻擊鐵三角夠煞食
德甲今季除咗睇拜仁係咪繼續橫行無忌之外，踏入「後高普時代」嘅多蒙特都係焦點。「蜜蜂兵團」新季由杜曹掌舵，雖然佢哋冇乜大手筆收購，但有馬高列奧斯、米希達利恩同奧巴美揚呢個攻擊鐵三角留效都一樣煞食，今晚主場面對缺少4件主將嘅慕遜加柏有望打響頭炮，多蒙特讓半一捧1.92倍上盤。（now670台、有線61及201台周日凌晨0:30直播）

高普離隊傷盡唔少「蜜蜂躉」嘅心，好在一直盛傳過檔巴塞嘅根度簡決定留隊，新季會夥拍由利華古遜來投嘅卡斯特羅鎮守中場，搭住「男神」馬高列奧斯、季前續約至2020年嘅奧巴美揚，以及米希達利恩，多蒙特中前場實力比起上季明顯「升呢」。

杜曹德甲首騷唔衰得
新帥杜曹嘅德甲領軍經驗豐富，雖然唔少人都擔心佢老人家嘅戰術未必適合「蜜蜂兵團」，但睇住佢哋喺季前賽輕取祖雲達斯，加上喺歐霸盃第3圈外圍賽兩回合計大炒禾夫斯貝加6蛋，就睇得出班波喺呢位新帥掌舵之下Run得幾順，今晚係杜曹接掌多蒙特之後嘅德甲首Show，試問又點會想喺主場球迷面前出醜吖！

慕遜陣容甩皮甩骨
對家慕遜加柏係上季德甲「三哥」，助教紐維利自爆入場睇過幾場多蒙特嘅季前熱身賽，話攞咗唔少料喎！有準備係好，但想喺多蒙特地頭搶分似乎唔易，事關中場安達夏恩、守將艾華路杜明基斯同隊長史蘭斯都養緊傷，另一悍將洛特維迪又要停賽，足足4件主將唔出得。況且佢哋上季次席射手麥斯古斯又已經離隊他投，慕遜加柏霎時間甩皮甩骨，今晚睇怕都係凶多吉少！