星期六有成九十幾場波，邊有可能場場玩得晒呀，最好就係玩速食、收快錢！今次就推介一場英冠賽事畀大家，富咸主場對白禮頓，每逢聯賽開咧，大部分球隊狀態都係未操起，往往半場都未能分出勝負，所以今場買半場和就最啱數，進取啲玩埋半場波膽0比0都一樣得！（周六晚10時開賽）

兩鬥富咸半場冇交收
白禮頓長期喺英冠打滾，睇番佢哋過去三季嘅季初聯賽成績，上季頭四場有兩場開出半場和，前季就仲誇張，頭七場有六場開出半場和，12至13球季嘅頭兩場都同對手喺半場冇交收。嚟到今個新球季，富咸同白禮頓都係一擔擔，開咧戰上半場分別同卡迪夫城及諾定咸森林打成0比0，跟住兩隊分途出征英聯盃對戰低組別球隊，富咸作客韋甘比、白禮頓作客修安聯，半場一樣係冇交收，睇得出雙方球員狀態都係好麻麻，最後睇埋雙方對賽往績，近兩次交手上半場又係0比0，今鋪唔博半場和同埋半場波膽「窿對窿」仲等幾時？