今晚英超變身「搖滾之夜」，韋斯咸主場對李斯特城，雙方新任領隊比歷同雲尼亞里都係搖滾音樂發燒友，擅長以澎湃樂曲，振奮軍心，效果相當理想。兩人強勢回歸英超，皆於首周賽事，領軍旗開得勝，韋斯咸爆冷力挫阿仙奴，李斯特城大勝新特蘭，表現激情四射。兩軍依家狀態弗到震，勢必一齊夾Band做場大騷，簡單揀入球大。（now 625周六時10時直播）

比歷一向醉心搖滾音樂，曾經係1支克羅地亞樂隊成員，結他造詣高超。08年更為佢執教嘅克羅地亞國家隊，灌錄打氣歌曲，備戰歐國盃。呢位46歲少帥球員時代効力過韋斯咸同愛華頓，今夏以領隊身份回巢「錘仔幫」，雖然喺歐霸盃第3圈外圍賽出局，但球隊畢竟經過多場正式賽事練兵，時間夾得啱啱好，聯賽一開鑼，球員已經入晒局，上仗作客2比0擊倒兵工廠，贏得好有說服力。今仗返回主場，肯定更心雄，踢得更進取。

兩軍領隊音樂潮人
曾於2000至04年執教車路士嘅雲尼亞里，雖然已經63歲，但原來係音樂潮人，李斯特城上仗以4比2擊敗新特蘭之後，雲帥大談成功秘訣，原來賽前佢播放英國萊斯特市搖滾樂隊Kasabian嘅勁歌，激勵士氣，球員聽到自己地區音樂，特別有共鳴，難怪表現咁醒神，亦反映雲尼亞里擅長掌握球員心理，令佢哋發揮潛能。

雲尼亞里堪稱「弱隊救星」，曾帶領卡利亞里、費倫天拿升上意甲，亦幫過帕爾馬護級成功，但佢教車仔、祖記、羅馬、國米等大球會，反而成績麻麻。因此，雲尼亞里今季成為李斯特城主帥，開正佢嗰瓣，可望帶來驚喜，今場同比歷激情碰面，可望上演入球騷。