曼聯今輪英超提早周五晚登場，作客對阿士東維拉！「紅魔鬼」開鑼戰旗開得勝，主場1比0擊敗熱刺，但過程驚險，球員未完全操起狀態，而且曼聯將於下周中鬥布魯日出戰歐聯附加賽首回合，關乎龐大經濟利益，不容有失，因此今場聯賽或會留力。維拉失去射手賓迪基後，入波本錢大減，難威脅曼聯大門，首選入球細。

（now 621周六凌晨2時45分直播）

曼聯5個新兵之中，除咗門將羅美路對辦，其餘4個迪比、舒韋恩史迪加、舒尼達連、達美安上仗鬥熱刺表現一般，尤其荷蘭翼鋒迪比未能同鋒線拍檔朗尼製造太多埋門攻勢，全場唯一入球仲係對手擺烏龍，曼聯嘅進攻能力實在令人失望。

曼聯肉緊下周中鬥布魯日
曼聯最大挑戰係下周三凌晨歐聯附加賽首回合，主場對比利時球隊布魯日。「紅魔鬼」闊別一屆重返歐聯，會方非常重視，因為涉及巨額收入，若然入唔到分組賽，肯定造成重大損失，特別係球會花費大量金錢增兵，更需要靠歐聯收入填數。相比之下，英超可以暫時放埋一邊，領隊尹戈爾今場畀部分主力休息亦唔出奇，即使上陣亦未必去盡。

阿士東維拉首場英超小勝新升班嘅般尼茅夫1比0，最離譜係全場只有兩次射門，只及對手四分之一，充分顯示射手賓迪基、中場戴爾夫離隊之後，維拉冇人識射門。事實上，維拉今季人腳變動頗大，佐敦阿休、伊祖沙古爾、維列度、佐敦艾馬維及米卡李察士等新兵仍需時間磨合，恐怕短期內難有起色。更何況今場對手係勁旅曼聯，估計維拉唔敢冒進，守和攞1分已有交代，雙方入波唔會多。