燈光騷賀德甲回歸！
德甲霸王拜仁慕尼黑今晚喺主場出擊，同漢堡合演德甲開鑼獨腳戲。雖然拜仁兩大天王列貝利、洛賓仲養緊傷，好在新兵杜格拉斯哥斯達、維達爾表現對辦，加上安聯球場賽前仲會整場燈光騷，氣氛咁high，對住今季大換血嘅漢堡，要炒起對手容乜易？拜仁讓2球，都要撐1.65倍嘅「讓主」！（now670台周六凌晨2:30直播）

拜仁喺贊助商安排下，安聯球場成功將燈光系統升級，由30萬個LED組成嘅燈光系統今晚啟用，球場外殼可以展現1,600萬種顏色之餘，仲可以節省60%電力消耗添！搞燈光騷咁大陣仗，唔炒起漢堡點向高層同粉絲交代先？

拜仁兩新兵表現對辦
再講吖，拜仁兩大主力列貝利、洛賓可能倦勤，好在隊波羅致咗薩克達快翼杜格拉斯哥斯達。呢件巴西國腳出名腳法好、速度快，出波準，另一中場新兵維達爾亦得到重用，表現對辦，加埋射手羅拔利雲度夫斯基重拾射門鞋，大勝響頭炮唔難喎。

漢堡大換血磨合需時
另邊廂嘅漢堡今季大換血，隊長雲達華治、中場比哈美等大將都紛紛離隊後，又入唔到高質素猛將，只係羅致到酒井高德、舒普洛克等人，磨合需時。雖然喺波琴嚟嘅小將基哥列舒治潛質優厚，弊在佢未踢過頂級聯賽，經驗輸晒，睇怕對住一眾拜仁超班球星都幾難發到圍咯。