第53屆德國甲組聯賽周六凌晨揭幕，衞冕拜仁慕尼黑於安聯主場布陣，迎戰德甲史上唯一全勤球隊漢堡。拜仁喺季前德超盃出師不利互射12碼不敵禾夫斯堡，教練哥迪奧拿背負沉重壓力，好在揭幕戰喜逢「私房菜」漢堡，而且對手季前準備同狀態都曳到極，欺善怕惡嘅拜仁可望大開殺戒，「讓球主客和」讓到兩球都冇有怕，照捧拜仁讓球主勝。

（now 670周六凌晨2時30分直播）

拜仁失落德超盃，哥迪奧拿備受更多質疑，今場德甲揭幕戰全球矚目，賽前相當肉緊，誓要大勝一仗令批評者收聲。球隊啱啱喺德國盃首圈作客以3比1贏咗第四級別聯賽球隊諾丁根，喺攝氏36度高溫下踢完呢仗，對提升狀態肯定有正面幫助。拜仁喺哥迪奧拿手上強調絕對控制，呢種踢法遇上一線勁旅經常唔夠硬淨，但遇上弱旅就可以予取予攜，而且漢堡一向係拜仁「私房菜」，拜仁喺聯賽主場對漢堡已經6連勝，近5季戰果分別係6比0、5比0、9比2、3比1同8比0，證明漢堡去到安聯球場完全冇得揮！

漢堡教頭預輸雙位數
漢堡已經連續兩季靠踢護級附加賽幸免降班，主要原因係高層管理不善，球隊上季季尾危急關頭換帥仲要冇較似樣嘅教練肯接手，結果要搵前度失敗教頭拉巴迪亞頂上，最終好運留到級但表現冇乜起色，今夏佢哋仲要大換血，超過半隊一隊球員離開，新加盟球員既未融入球隊亦未證明級數，結果喺德國盃首圈加時後畀第四級別嘅卡爾斯耶拿淘汰出局，難怪拉巴迪亞今仗賽前都好悲觀咁話：「漢堡去到安聯球場必須要交出最佳表現，否則輸雙位數都唔出奇。」