所謂「知恥近乎勇」，被人柴台柴到上心口仲唔發威就勢係假。兩大球星派路同林柏特今夏齊齊亮相美職受盡愛戴，殊不知呢對中場上仗作客紐約紅牛輸波失威之餘，仲畀敵對球迷寸佢哋垂垂老矣不堪大用，試問呢啖氣佢哋點吞得落？聽朝紐約城喺主場迎戰美職一哥華盛頓聯隊，呢對「老黃忠」梗係要踢番場好波喇，撐1.75倍入球大。（TVB301台周五早上7:00直播）

紐約城上仗作客輸畀紐約紅牛0:2，唔單止畀同城死敵落晒面，當時一班紐約紅牛球迷仲特登喺場內掛住幅banner，上面印有派路同林柏特彎晒腰兼攞埋拐杖嘅圖案，又寸爆紐約城係專收過氣球星嘅老人院。堂堂中場大師咁樣畀人嘲笑法，呢場點可以唔騷哥利挽回面子先？

華盛頓前線勁Fit
相信無人會懷疑派路同林柏特嘅傳送技術，係差在有冇人可以將個波送入網啫。呢點大家又唔使咁擔心，事關射手韋拿最鍾意喺自己地頭搵食，呢位西班牙前鋒近6次主場出擊轟入7粒，加上連續2次主場建功嘅中場湯馬士麥拿馬拉開火，唔愁紐約城冇貨交喎。

另邊廂嘅華盛頓亦唔係善男信女，呢支聯賽一哥目前連勝3仗兼喪入10球，氣勢一時無兩，呢鋪邊會咁輕易舉白旗投降。況且鋒將路菲、艾斯賓杜拿、迪里安近排頻頻開炮，今仗對住近7仗喪失17球嘅紐約城防線，肯定同對手鬥多波入啫！