佐藤壽人爭做士哥王
因東亞錦標賽而小休嘅日職次階段今日重新開打，重頭戲係志切做次階段一哥嘅廣島三箭，主場迎戰排第四嘅鹿島鹿角。三箭唔單止連場報捷弗到爆，王牌射手佐藤壽人仍為力爭成為日職史上士哥王而搏老命，動力十足，絕對唔赦強敵鹿角，小讓平半不容錯過。（有線61及201台周三晚6時直播）

邊隊係日職依家最弗球隊？當然係排緊榜首嘅廣島三箭喇，呢班波踏入次階段上晒身，5戰贏晒之餘仲狂轟18粒，包括擊敗首階段盟主、打破日職最佳開局嘅浦和紅鑽不敗金身，氣勢勁到冇朋友。三箭進攻點分得好散，除射手佐藤壽人外，戴恩費斯杜格拉斯、柏好文、淺野拓磨、青山敏弘等都能入球，其中戴恩費斯杜格拉斯之前兩仗均梅開二度，火力全開唔係人咁品。

雖然三箭王牌佐藤壽人近況稍見回落，但呢位老大哥始終係球隊精神領袖，依然不可或缺。佐藤壽人上仗對神戶勝利船都有一球進帳，令佢目前喺日職累積155個入波，為現役球員之冠，只差兩粒就追平前日本國腳兼傳奇射手中山雅史所保持嘅157球紀錄，成為日職史上士哥王之一，佐藤壽人一向鬥心十足，眼見破紀錄在望，今仗對鹿島鹿角又點會唔搏呢？

鹿軍防守唔掂難招架
鹿角一向攻強守弱，可惜今仗有前鋒甸尼因傷避戰，冇咗佢攻力點都差啲，況且防守又唔掂，試過作客淨吞弱旅松本山雅兩蛋，好難頂得住三箭嘅狂轟猛炸。睇番之前10次交手，鹿角贏得3場咁大把，加上三箭全力衝擊次階段冠軍，挾住近6主場不敗兼贏5仗嘅氣勢，要擊退鹿角唔難，小讓平半有兩倍分頭，呢個上盤非常值博。