話就話係盃賽王者之戰，但係今日嗰場駿河銀行盃大阪飛腳主場對河床，其實同表演賽冇乜分別，而且兩隊都有幾件主力唔出得，呢啲友誼波博吓1.83倍入球大冇壞。（開賽時間：周二晚6:00）

呢項賽事舉辦咗幾年，係由日聯盃冠軍對南美自由盃盟主，聽落好似好有卡士，實質國際足協係唔承認嘅，只得南美足協列佢為正式賽事嘅啫，所以阿根廷傳媒報道呢個盃賽嗰陣，都流露出不以為然，係個勞民傷財嘅雞肋波味道，佢哋不停重複講河床要飛17粒鐘，仲要响法蘭克福逗留24小時至到日本嘅經歷，形容呢隊「百萬富翁」抵達大阪冇乜點練過波就上戰場。

河床焗靠沙維奧拿孭飛
至攞命嘅係，河床根本唔齊人，扭計要走嘅鋒將洛迪高莫拿、卡雲拿基都冇隨軍，中場艾拿利奧、後衞馬馬拿又養緊傷，少咗4件主將，前鋒線惟有靠33歲嘅沙維奧拿擔大旗，呢位仁兄雖然威過，不過始終係好多年前嘅事，河床家陣嘅攻擊力，好難同自由盃嗰時比較。

主隊飛腳亦唔見得好幾多，佢哋有龍門東口順昭、後衞藤春廣輝、丹羽大輝、米倉恒貴、中場倉田秋同埋前鋒宇佐美貴史6件，剛啱代表日本踢完東亞錦標賽，尋日先至返到當地，監督長谷川健太都唔想玩殘佢哋，免得禮拜日响日職作客FC東京要疲兵作戰，多數起用一批後備。既然大家都出唔足人兼玩玩吓，冇理由唔試吓個入球大。