頭頭碰着黑 唔敢貪盃仔
英冠球隊昆士柏流浪（QPR）今晚會喺英格蘭聯賽盃首圈賽事，作客乙組仔伊奧維，雖然QPR名氣贏晒，不過呢班波向來唔重視英聯盃，加上球隊近排黑氣纏身，睇怕好難喺90分鐘內贏波解決對手，一於捧2.08倍「讓球主勝」。（TVB301周三凌晨2:45直播）
今季係昆士柏流浪呢3年嚟第2度降落英冠比賽，估計呢支「升降機」會以升班為首要目標，未必擺咁多心機落盃仔度。事實上，佢哋連續6年喺英聯盃都唔走得遠，當中更曾經畀低組別球隊踢出局，好似上屆第2圈作客以0:1敗走伯頓，再上一屆甚至喺主場吞史雲頓兩蛋畢業，所以呢鋪佢哋作客乙組嘅伊奧維，都未必十拿九穩。
領隊爆留唔住王牌射手
況且，QPR近排頭頭碰着黑，聯賽首戰作客以0:2輸畀查爾頓都算，領隊基斯藍斯日前仲坦承留唔住主力前鋒查理柯士甸，只要邊間英超球會畀得起錢，就會放走呢位上季英超入18球嘅前鋒。更大鑊嘅係，由於QPR違反財政公平條例，英國傳媒指呢班波將面臨至少800萬鎊（約9,600萬港元）罰款。啲衰嘢一單接一單咁嚟，你叫班球員點樣專心備戰吖？
今季降落英乙嘅伊奧維，啱啱喺開咧戰不敵埃克塞特2:3，明知自己越級挑戰，今場梗係全力穩守為先啦，佢哋早前仲向史雲斯借用右閘干拿羅拔斯一個月，防守能力有望增強，加上英聯盃向來係爆冷溫床，伊奧維藉主場之利反咬對手一啖都唔奇。
