今晚有六十幾場波，當中大部分都係盃賽，但阿King睇中咗場蘇超大戰，由登地聯主場迎戰登地嘅「登地打吡」。兩隊近年喺打吡戰都踢到飛沙劈石，近十次交手有八次開出大盤，今仗再遇相信都係各不相讓，阿King睇好今仗入波唔會少，捧大盤。（TVB 302周三凌晨2時45分直播）

登地聯上周六作客憑對手路爾斯拿寧嘅烏龍波同埋西蒙梅利補時嘅入球，以2比0險勝馬瑟韋爾，打開聯賽勝利之門，球隊雖有前鋒馬里奧比拿迪同杜爾、後衞保羅柏頓及哥林摩利斯未好番繼續缺陣，但登地聯近年喺打吡戰食住登地，今仗主場出擊冇理由放軟手腳，應會力爭勝利。

登地剛戰喺領先下畀赫斯連追兩球反勝，球員士氣相信會有所影響，今仗更有首場聯賽梅開二度嘅射手萊利路爾同埋德國前鋒坦古歷因傷缺陣，對球隊攻力相信會有所影響。不過，今仗分屬同市打吡戰，翻查兩軍近十次交手，竟然有八次開出入球大，當中更不乏大比數戰果，可見兩軍交鋒一定有前冇後「打甩髀」，今仗相信都唔會例外，阿King撐入球大。

羅斯郡+1可秤先
另一場蘇超由聖莊士東主場對羅斯郡，聖莊士東續有梅利大衞臣同戴夫麥基因傷避戰，而羅斯郡雖有後衞美列確特唔踢得，但論近況始終略勝一籌，今仗作客受讓值得一試。阿甲聖馬田聖祖安主場對拉魯斯，拉魯斯後衞巴利桑尼早前車禍身亡，一班球員喺呢場補賽相信會踢好波以慰前者在天之靈，但球隊近期入得又失得，遇上主場表現唔錯嘅聖馬田聖祖安，相信會上演入球騷，捧大盤。