曼城客W形勢明朗

今晚深夜英超獨腳戲由曼城作客西布朗，「藍月亮」王牌阿古路將佢鋪「轉冧癮」帶埋落球會度，今季改穿10號靚冧搏殺，撞正「私房菜」西布朗，呢位上季英超神射手仲唔趁機數胡，冧番嗰班「不幸破財」嘅球迷咩，客W乃不二之選。(now 621周二凌晨3時直播)

西布朗正宗私房菜
阿古路經常喺阿根廷國家隊轉換球衣冧巴，近3年先後着過16、20同11號，今夏曼城賣走前鋒迪斯高，阿古路即刻擸咗呢位波斯尼亞前隊友留低嘅10號波衫，仲話10號對佢有特別意義，由於當初加盟嗰陣迪斯高已着住先揀16號，咁又係嘅，阿根廷件10仔畀老友美斯長期霸住，阿古路一路都只能得個恨字，有時轉到個啱心水冧巴，落到場比賽都零舍順，好似美斯自08年喺巴塞接替朗拿甸奴改穿10號之後，便帶領「地上最強」榮膺6冠王，自己亦登上球王之路，難怪阿古路對今次成功「轉冧」堅開心喇！

雖然阿古路承諾為印咗舊號碼波衫嘅球迷，親筆簽名作為補償，但畢竟粉絲已破財買咗件唔啱使嘅波衫，你話唔嬲就假咯，呢位王牌點都要再做番啲嘢氹佢哋，最好嘅方法梗係用士哥助曼城旗開得勝，今仗作客遇正西布朗可謂天助佢也。斯維一向都對西布朗主帥佩尼斯推崇備至，呢位「護級專家」總能喺有限資源下交到貨，今夏簽入列基林拔、占士麥堅恩同占士謝斯達等失意軍人，值得期待。可惜曼城係佢哋剋星，近10次對碰西布朗輸咗9次，近4次交手最低消費都要淨輸兩球，遇上力爭數胡嘅「阿古獸」，睇怕又要做多次炮灰。

史達寧融入冇問題
「藍月亮」今夏放走迪斯高、林柏特同占士米拿，好彩從利物浦高價來投嘅年輕翼鋒史達寧逐漸融入，呢位「濕手巾」扭得射得速度快，拍住上季入咗26粒嘅英超神射手阿古路，西布朗真係有得震冇得瞓，曼城客W有1.51倍非常穩陣，不妨捧埋有1.75倍嘅入球大。