擔正曼城10號仔
「英超星期一」戲碼唔錯，西布朗喺開咧戰主場對曼城，受讓半一都要唔過，因為西布朗近10次對賽輸足9次，而且曼城王牌阿古路已經好番可以候命，首次以10號身份喺英超登場，加上佢當選埋曼城上季最佳球員，「新生阿Kun」邊有得擋呀？今晚曼城個上盤都幾穩陣！（now621台周二凌晨3:00直播）

西布朗新簽嘅利物浦前鋒列基林拔、韋根翼鋒占士麥堅恩同侯城中堅占士謝斯達，都有機會喺開咧戰打正選，但其實領隊佩尼斯話，仲未砌到心水陣容，特別係羅致阿仙奴前鋒祖爾甘保失敗覺得好可惜，加上佢哋近10次對曼城輸9次，近4次交手至少淨輸2球，無謂同荷包拗頸揀下盤。

西布朗新兵多 陣容未砌掂
另一方面，曼城喺熱身賽表現都幾差，除咗有中鋒迪斯高、中場林柏特同占士米拿離隊，新簽嘅阿士東維拉中場戴爾夫仲有傷未踢得。不過咁，高價收購嘅利物浦前鋒史達寧似乎同新隊友夾得幾好，而且佢嘅速度同盤扭技術，應該恰到西布朗後防班大隻佬，有波入唔出奇。

「曼城最佳」阿古路 列神射手大熱
最緊要係，原本話身體不適嘅阿古路，證明可以復出，雖然佢因為踢美洲盃遲歸隊，缺席曼城嘅季前賽，但佢開咧前得到10號波衫，又力壓大衞施華當選埋球會上季最佳球員，加上佢被博彩公司捧成3.75倍英超神射手大熱門，「新生阿Kun」應該比上季攻入26個聯賽入球嗰陣更加勁！